கவிதை போட்டி ( Tamil Kavithai Competition 2022 - Sltamil)

தமிழ் கவிதை - முதிர்ந்த மலர்

தேநீர் குவளைகளும்
திகட்டும் இனிப்புகளும்
வாயிலில் செருப்புகளும்
தினம் நிரம்பி தான் வழிகின்றன..!

அவள் மனமெனும் மாய இருளில்
அழுந்திக் கிடக்கும் ஆழ் உணர்வுகளில்
அமிலம் கூட்டி இராசயன கழிவுகளாய்
கவலைகளை உரமாக்கிட..!

விழிப்படலத்தில் விழுந்திடாமல்
சன்னல் வழி இரசித்த ஆண் முகங்கள் ஏனோ,
அவளுக்கு அத்தனை அழகாய் தெரிந்திடவில்லை
தெரிந்திடவும் காரணமில்லை..!

கூடிவந்ததா?
அமைந்து விட்டதா?
பரிகாரம் செய்தீரா?
உடலில் குறையுண்டோ?
காதல் கீதல்..
ஊசியாய் உதட்டு வார்த்தைகள்
செவிக்கு திகட்டும் கீர்த்தனைகள்

அலங்கார பொம்மையாய்
ஆட்டு சந்தையாய்
அவசர பொருளாய்
அவள் மனமும் உடலும்
விற்பனைக்கு தயாராய்..!

அவர்கள் அதன் போக்கில்
அகவை அதன் போக்கில்
கனிந்திடுமா..? உதிர்ந்திடுமா..?
இந்த முற்றிப்போன பூ..!